card

Байгууллага

Мэндчилгээ

Эрхэм таны амрыг эрж сайн сайхан бүхнийг хүсэн ерөөе.

2019 он Завхан аймгийн хөдөө аж ахуйн салбарын хувьд  ололт амжилтаар дүүрэн жил байлаа. Малчдын маань уйгагүй хөдөлмөрийн үр дүнд малын тоо өсөж нийт 3.8 сая толгой мал тоологдсон.

Нутгийн малчид, уяачид, энэ салбарын мэргэжилтнүүдийн хөдөлмөр зүгтгэл үнэлэгдэн Тэс омгийн адуу үүлдрээр батлагдаж бусад бүс нутгуудад сайжруулагчаар ашиглах боломж нэмэгдлээ.

Улсын төсөв болон аймаг, сумын орон нутгийг хөгжүүлэх сан, аж ахуйн нэгжүүдийн дэмжлэгээр худаг гаргах, бэлчээрийн хортон мэрэгчидтэй тэмцэх ажлыг сумдад зохион байгууллаа.

Газар тариалан эрхлэгчдийн уйгагүй хөдөлмөрийн  үр дүнд хураан авсан үр тариа, малын тэжээл, төмс, хүнсний ногооны хэмжээ нэмэгдэж арвин ургацтайгаар атар газар эзэмшсэний 60 жилийн ойгоо угтан гавьяат агрономичтой болж, хөдөлмөрийн гавьяаны улаан тугийн одонгоор 1, алтан гадас одонгоор 7, хөдөлмөрийн хүндэт медалиар 2, атрын алдар медалиар 47, “атар 60” ойн медалиар 142 тариаланч шагнуулж, нэгэн жарны ажлын амжилтаа хэлэлцэж, ирэх он жилүүдийн зорилтоо тодорхойлсон он жил боллоо.

Жижиг дунд үйлдвэрлэлийг дэмжих сангаас 998 сая төгрөгийн зээлийг ноос, арьс шир боловсруулах, бүтээгдэхүүн үйлдвэрлэх, оёдлын, мах махан бүтээгдэхүүний, сүүний, барилгын ханын материалын үйлдвэрлэлд олгож бизнесийн үйл ажиллагаанд нь дэмжлэг үзүүлэв. Үйлдвэрлэл, бизнес эрхлэгчдийн тоо жилээс жилд нэмэгдэж, тэдний туршлага, ур чадвар, менежмент, маркетинг сайжирч, хүн ардынхаа эрэлт хэрэгцээнд нийцсэн бүтээгдэхүүнийг илүү тоо хэмжээ, чанартайгаар нийлүүлдэг болж байна.

Сум хөгжүүлэх сангийн зээлийн эргэн төлөлтөөс 239 аж ахуйн нэгж иргэнд 1055.89 сая төгрөгийн зээлийг олгож орон нутагт үйлдвэрлэл, жижиг бизнес эрхэлж байгаа иргэддээ дэмжлэг үзүүлсэн байна.

Сумдаас ирүүлсэн саналыг үндэслэн 7 сумын арьс шир боловсруулах үйлдвэрлэл эрхлэгчдэд сургалт явуулан 63,9 сая төгрөгийн 21 нэр төрлийн тоног төхөөрөмжийг гадаадын тусламжийн хөрөнгөөр олгосон байна.

Дэлхийн зөн олон улсын байгууллагаас сумдад зохион байгуулагдсан 28 бүлэгт 150 сая төгрөгийн тоног төхөөрөмж  олгосон ба үүний 25 нь оёдол хийх, 3 нь жимс, жимсгэнэ боловсруулахад ашиглагдах тоног төхөөрөмж болно.

Нэгдсэн үндэсний байгууллагын “Монголын унаган байгалийн хүлцэл, тогтворжилтыг хангах” төслийн шугамаар Дөрвөлжин суманд хоногт 0,5 тн чацаргана боловсруулах хүчин чадалтай үйлдвэр ашиглалтад орсон ба АДРА ОУБ-ын 155000 ам долларын хөрөнгө оруулалтаар Идэр суманд европ бяслагийн үйлдвэр баригдаж байна.

Завхан аймагт үйл ажиллагаа явуулж байгаа “Тэс шим”, “ЭДГС“, “Завхан хүнс”, “Мах маркет” зэрэг үйлдвэрүүд дотоодын зах зээлд 264000 тн, гадаад зах зээлд 2344 тн мах нийлүүлж мал сүргийг эргэлтэнд оруулж, бүтээгдэхүүн үйлдвэрлэлийг нэмэгдүүллээ.

Ирэх 2020 онд бэлчээрийн усан хангамжийг сайжруулах, бэлчээр хамгаалах арга хэмжээнд нийтийн оролцоог нэмэгдүүлэх, эрчимжсэн аж ахуйг хөгжүүлэх чиглэлээр иргэддээ тусалж хамтран ажиллах, усалгааны системүүдийг нэмж засварлах ашиглалтыг сайжруулах, төмс, хүнсний ногоо, малын тэжээл, үр тарианы тариалалтыг нэмэгдүүлэх, үйлдвэрлэл, үйлчилгээ эрхлэгчиддээ зориулан зээлийн үйлчилгээний хүртээмж, мэргэжилтнүүдийн зүгээс үзүүлэх дэмжлэг тусламжийг сайжруулах болно.

Технологийн дэвшлийг ашиглан та бүхэнтэй мэдээлэл солилцож байгаадаа баяртай байгаа бөгөөд та бүхэн манай сайтад  зочлоорой. Бид та бүхэнд хэрэгцээтэй мэдээллүүдийг цаг тухайд нь хүргэхийн төлөө хичээн ажиллах болно.Та бүхний шинэ оны ажилд амжилт хүсье.

ЗАВХАН АЙМГИЙН ХҮНС, ХӨДӨӨ АЖ АХУЙН ГАЗАР

  • Мал ба газар тариалангийн яамны сайд Х.Чойбалсангийн гарын үсэг бүхий тушаалаар “Мал эмнэлгийн салбар хороо” нэртэйгээр Улиастай хотод байгуулагдсан.
  • Мал эмнэлгийн газар
  • Хөдөө аж ахуйн газар
  • Хүнс, хөдөө аж ахуйн газар
  • Хүнс, хөдөө аж ахуй, жижиг, дунд үйлдвэрийн газар
  • Засгийн газрын 415 дугаар тогтоол, Үйлдвэр хөдөө аж ахуйн сайдын А/170 дугаар тушаалаар Үйлдвэр, хөдөө аж ахуйн газар
  • Засгийн газрын 08 дугаар тогтоолоор Хүнс, хөдөө аж ахуйн газар болж өөрчлөгдсөн.

Алсын хараа ба Зорилго

Алсын хараа:

Улсын тэргүүний  хүнс, хөдөө аж ахуйн газар, баруун бүсдээ тэргүүлэгч төрийн байгууллага байх

Зорилго:

Аймгийн Хүнс, хөдөө аж ахуй газрын эрхэм зорилго нь эдийн засгийн өсөлтийг хангахуйц хөдөөгийн хөгжлийг дэмжих, Хүнс, хөдөө аж ахуй, жижиг, дунд  үйлдвэрлэлийн тогтвортой өсөлтийг хангах, бүтээгдэхүүний чанар,  өрсөлдөх чадварыг нэмэгдүүлэх, эрчимтэй, үр ашигтай салбар болгоход оршино.

Захиргаа аж ахуйн алба

Байгууллагын хэвийн үйл ажиллагааг хангах, хөдөө аж ахуйн салбарын зорилго, зорилтыг хэрэгжүүлэх, бодлогын баримт бичгийн хэрэгжилтийг хангах, төрийн албан хэрэг хөтлөлтийн үйл ажиллагааг стандартын дагуу явуулах ажлыг хариуцан ажиллаж байна.

Захиргаа аж ахуйн алба
Үйлдвэр, худалдаа үйлчилгээний алба

Үйлдвэр, худалдаа үйлчилгээний алба

Малчдын хоршоо, хөдөө аж ахуйн  бараа түүхий эдийн бирж, хөнгөн хүнс, худалдаа үйлчилгээ, газар тариалан хөгжүүлэх ажлыг хариуцан ажиллаж байна.

Мал үржлийн алба

Мал сүргийн үүлдэрлэг байдал, ашиг шимийн түвшинг дээшлүүлэх, нутгийн шилмэл омгийн малын генетик нөөцийг хамгаалах чиглэлээр мал сүрэгт ангилалт, үржлийн хянан баталгаажуулалт явуулж шилмэл хээлтүүлэгч нөхөн сонгох замаар цөм сүргийн тоо толгойг нэмэгдүүлэх, бэлчээр хамгаалал, усан хангамжийг сайжруулах ажлыг хариуцан ажиллаж байна

Мал үржлийн алба

ХХААГазрын бүтэц, зохион байгуулалтын бүдүүвч